By Գրետա Միրզոյան 
Հայաստանի Հանրապետության կառավարությունը ներկայացրել է Հայաստանի քաղաքացու նոր կենսաչափական անձնագրի նմուշը, որի գույնը կփոխվի կապույտից մուգ կարմիրի։ Այս մասին հայտնի դարձավ ապրիլի 28-ին ՀՀ ներքին գործերի նախարար Արփինե Սարգսյանի և վարչապետ Նիկոլ Փաշինյանի հանդիպման ընթացքում։
Նոր անձնագրերը նախատեսվում է, որ կներկայացնեն հայկական ինքնությունը, պատմամշակութային ժառանգությունը և պետականության խորհրդանիշները։ Դրանցում կներկայացվեն Հայաստանի ուրվագծային քարտեզը, Մեսրոպ Մաշտոցի ստեղծած այբուբենը և հայերեն տառերով գրված առաջին նախադասությունը՝ «Ճանաչել զիմաստություն և զխրատ, իմանալ զբանս հանճարոյ»։
Անձնագրի էջերում պատկերված են հայկական պատմության և մշակույթի կարևորագույն էլեմենտներ։ Սկսած հայերի ծագումնաբանությունից՝ Հայկ Նահապետի պատկերից և Գեղամա լեռներում և Ուխտասարում հայտնաբերված ժայռապատկերներից, այնուհետև անցնում է Երևանի հիմնադրման մասին սեպագիր արձանագրությանը, որը հայկական ինքնության հիմնաքարերից է։ Պատկերված է նաև գիտնականների կողմից վերականգնված Էրեբունի ամրոցի պատկերը, ինչպես նաև Արտաշեսյանների շրջանի սրաքարերը, որոնց վրա կան արամեական արձանագրություններ։
Անձնագրի էջերում կարելի է տեսնել նաև 301 թվականին քրիստոնեության ընդունումը խորհրդանշող Մայր Աթոռ Սուրբ Էջմիածինը, ինչպես նաև ժամանակակից պետականության խորհրդանիշները՝ նախագահի նստավայրը, ՀՀ կառավարության, Ազգային ժողովի և Սահմանադրական դատարանի շենքերը։
Այլևս նոր անձնագրերի վրա չի պատկերվի Արարատ լեռը։ Խոր Վիրապի վանական համալիրի պատկերը ներկայացված է այնպես, որ դրա ֆոնին չերևա լեռը, ինչը տարբերվում է ավանդական պատկերներից, որտեղ վանքը միշտ պատկերվում էր Արարատի ֆոնին։
Այս որոշումը կայացվել է 2025 թվականի նոյեմբերի 1-ից, և նմանատիպ որոշում կայացվել է նաև սահմանը հատելիս օգտագործվող պետական դրոշմակնիքների վերաբերյալ։ Այդ որոշումը կայացվել է թուրքական պատվիրակության Երևան կատարելիք այցի նախօրեին։ Վարչապետ Նիկոլ Փաշինյանը նման քայլը բացատրել է «Հայաստանի միջազգայնորեն ճանաչված սահմանների հետ կապված խորհրդանիշները սահմանային կնիքի վրա պատկերելու ցանկությամբ»։