By Գրետա Միրզոյան 
ՀՀ վարչապետ Նիկոլ Փաշինյանը հայտարարել է, որ Հայաստանի անվտանգության և խաղաղության երաշխիքը ուժեղ և մարտունակ բանակն է։ Այս մասին նա ասել է Հրազդան քաղաքի բնակիչների հետ հանդիպման ժամանակ ունեցած ելույթում։
«Մեր բանակը մեզ պետք է, առաջին հերթին, խաղաղության համար։ Մենք պատրաստվում ենք խաղաղության, քանի որ հասկանում ենք, որ ուժեղ և մարտունակ բանակը շատ կարևոր է խաղաղության համար։ Ուժեղ և մարտունակ բանակ չունեցող երկիրը կարող է դառնալ ագրեսիայի համար գայթակղություն։ Ուստի մենք միշտ պետք է ունենանք ուժեղ և մարտունակ բանակ, բայց նրա խնդիրը պետք է լինի Հայաստանի միջազգայնորեն ճանաչված տարածքի պաշտպանությունը։ Եվ սա է անվտանգության և խաղաղության երաշխիքը, սա երաշխիքն է, որ մենք մեր պետությունը փոխանցելու ենք սերնդեսերունդ», – նշել է վարչապետը։
Նախքան Հրազդան այցելությունը՝ Նիկոլ Փաշինյանը հանդիպում էր ունեցել Ծաղկաձորում, որտեղ անդրադարձել էր 300 հազար ադրբեջանցիների վերադարձի թեմային։ Նրա խոսքով՝ այդ թեման անվերադարձ փակված է։
«Հայաստանը չպետք է օրակարգ բերի Բաքվից, Սումգայիթից, Կիրովաբադից, Ղարաբաղից հեռացած հայերի վերադարձը, քանի որ այդ դեպքում հայելային օրակարգեր են բացվում։ Սա հանցագործություն է Ղարաբաղի ժողովրդի դեմ։ Մենք այսօր միլիարդներ ենք ծախսում, որպեսզի Ղարաբաղի ժողովուրդը Հայաստանում տեղավորվի, բայց պատերազմի եռագլուխ կուսակցությունն ամեն ինչ անում է, որ Ղարաբաղի ժողովուրդը չհանգստանա», – ավելացրել է նա։