By Գրետա Միրզոյան 
«Ուժեղ Հայաստան» ընդդիմադիր դաշինքի առաջնորդ Սամվել Կարապետյանը հայտարարել է ընդդիմադիր ուժերի միավորման գործընթացի մեկնարկի մասին՝ ընտրություններից հետո ընդդիմադիր կոալիցիա ստեղծելու նպատակով։
Ըստ Կարապետյանի՝ ընտրություններից առաջ ընդդիմադիր ուժերը չկարողացան համաձայնության գալ, և շատերն իրենց ուժերը գերագնահատեցին։ Նա նշել է, որ այս միավորումն այժմ կարևոր է երկրի և ժողովրդի համար։
«Ես հայտարարում եմ ընդդիմադիր ուժերի միավորման գործընթացի մասին, քանի որ մենք այդ թերացումն ունեցել ենք ընտրություններից առաջ։ Բազմաթիվ ընդդիմադիր ուժեր, որոնք, գուցե, անկեղծորեն պայքարում էին, գերագնահատեցին իրենց ուժերը։ Մենք չկարողացանք համաձայնության գալ բազմաթիվ քաղաքական ուժերի հետ, ուստի այս միավորումն այժմ կարևոր է մեր երկրի և մեր ժողովրդի համար», – ասել է նա։
Կարապետյանը հավատում է, որ այն քաղաքական ուժերը, որոնք արժևորում են Հայաստանը, կաջակցեն այս նախաձեռնությանը։ Նա առաջարկել է ստեղծել համակարգող խորհուրդ, որը կիրականացնի ուղիղ եթերում շփումներ և կազմակերպի պատշաճ քննարկումներ։
Նրա խոսքով՝ այս գործընթացի միջոցով նպատակ ունեն բացահայտել երկրի առջև ծառացած բոլոր խնդիրները, դիմել ժողովրդին, որոշել ճիշտ գործելակերպը և ձեռնարկել համապատասխան քայլեր։