By Զարուհի Քալաշյան 
Ամենշաբաթյա մամուլի ասուզրույցի ընթացքում Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան հայտարարել է, որ Հայաստանի կողմից Եվրասիական տնտեսական միության (ԵԱՏՄ) անդամ երկրների առաջնորդների առաջիկա հանդիպմանը վարչապետ Նիկոլ Փաշինյանի մասնակցության հրաժարումը վերածվել է համակարգի, որը ստեղծել է հայկական կառավարությունը։
«Հայկական կողմը պաշտոնական ծանուցում է ուղարկել այն մասին, որ վարչապետ Նիկոլ Վովայի Փաշինյանը չի կարողանա ներկա գտնվել ԵԱՏՄ-ի անդամ պետությունների ղեկավարների հաջորդ հանդիպմանը։ Նրա տեղում կներկայանա փոխվարչապետ Մհեր Գրիգորյանը»,- նշել է նա։
Զախարովան ընդգծել է, որ նման իրավիճակներ նախկինում էլ են եղել, երբ ԵԱՏՄ-ի անդամ պետությունների ղեկավարները տարբեր պատճառներով չեն մասնակցել միավորման մարմինների աշխատանքին։ «Դա, իհարկե, ցանկալի չէ, բայց պատահում է։ Խնդիրը մի փոքր այլ բանում է․ նրանում, որ դա վերածվում է մի համակարգի, որը, ինչպես հասկացանք, այս ուղղությամբ՝ նկատի ունեմ տվյալ կառույցի աշխատանքի ուղղությամբ, ստեղծել է Նիկոլ Վովայի Փաշինյանը»,- ասել է նա։
Դիվանագետը նաև նշել է, որ Մոսկվան նախընտրում է դատել Հայաստանի կառավարության կոնկրետ գործնական քայլերի և դրանց ազդեցության միջոցով՝ որոշակի եվրոպամետ քաղաքականության իրականացման շրջանակներում։
Զախարովան ևս մեկ անգամ ընդգծել է, որ Ռուսաստանը բոլոր մակարդակներում բազմիցս հստակեցրել է, որ հնարավոր չէ համատեղել ԵԱՏՄ-ին անդամակցությունը մեկ այլ ինտեգրացիոն բլոկի վերազգային կարգավորող մեխանիզմների ներդրման հետ։ Նրա խոսքով՝ այս ամենն ունի կոնկրետ պատճառ. այն է, որ արևմտաեվրոպական, եվրամիութենական կառույցները «վարում են կործանարար քաղաքականություն՝ ապօրինի պատժամիջոցների քաղաքականություն հենց այն երկրների նկատմամբ, որոնք մտնում են ԵԱՏՄ-ի կազմի մեջ»։