ԵՄ-ն նշանակեց Հայաստանում Եվրոպական միության քաղաքացիական դիտորդական առաքելության նոր ղեկավար

Եվրոպական միության խորհուրդը որոշել է Սատու Կոյվուին նշանակել Հայաստանում Եվրոպական միության քաղաքացիական դիտորդական առաքելության (EUMA) նոր ղեկավար։ Նա պաշտոնը կստանձնի 2026 թվականի փետրվարի 20-ին՝ փոխարինելով Մարկուս Ռիտերին։

Սատու Կոյվուն ֆիննական ոստիկանության բարձրաստիճան աշխատակից է, որը ունի ավելի քան 35 տարվա աշխատանքային փորձ ազգային և միջազգային մակարդակներում։ Նրա կարիերան հարուստ է միջազգային առաքելություններով։ Նա զբաղեցրել է ղեկավար պաշտոններ ՄԱԿ-ի և ԵՄ-ի առաքելություններում՝ պաղեստինյան տարածքներում, Ռուանդայում, Նամիբիայում և Կիպրոսում։ Նախքան EUMA առաքելության ղեկավարի պաշտոնը ստանձնելը նա աշխատել է Ֆինլանդիայի Ազգային ոստիկանական բաժանմունքում՝ որպես կադրերի բաժնի պետ։

Նոր ղեկավարի նշանակման որոշումը կայացվել է ԵՄ քաղաքական կոմիտեի և անվտանգության կոմիտեի կողմից՝ 2026 թվականի փետրվարի 17-ին։

ԵՄ-ի կողմից հրապարակված հաղորդագրության մեջ նշվում է, որ EUMA առաքելությունը Հարավային Կովկասի տարածաշրջանում խաղաղությանն ու կայունությանն աջակցելու ԵՄ ջանքերի կարևոր մասն է։ Առաքելության հիմնական խնդիրն է դիտարկել հայ-ադրբեջանական սահմանի հայկական կողմում տեղի ունեցող իրավիճակը և դրա վերաբերյալ հաշվետվություններ կազմելը։ Բացի այդ, առաքելությունը նպաստում է այդ շրջաններում մարդու անվտանգության ապահովմանը։ EUMA առաքելության գործող մանդատը նախատեսված է մինչև 2027 թվականի փետրվարի 19-ը։ Այն իր կազմում ունի ավելի քան 200 միջազգային և տեղական աշխատակից, որոնք ներկայացնում են ԵՄ-ի 25 անդամ պետությունները և Կանադան։